Շոդերլո դը Լակլո | Վտանգավոր կապեր | համառոտ

Իրադարձությունները  նկարագրվում են հերոսների նամակներում:

17… թ.: Ֆրանսիա: Վիկոնտ դը Վալմոնը բավական երկար ժամանակ է ճանաչում տիկին դը Մերտոյին: Վերջինս հմայիչ է, սրամիտ և սիրային հարցերում նրանից պակաս փորձառու չէ:

Վիկոնտը, որ ամառն անցկացնում է իր ազգականուհու՝ տիկին Ռոզմոնդի մոտ, նամակ է ստանում մարկիզուհի Մերտոյից: Ցանկանալով վրեժխնդիր լինել իրեն լքած սիրեկանից՝ նա որոշել է այլասերել սիրեկանի տասնվեցամյա հարսնացուին՝ Սեսիլ Վոլանժին: Վիկոնտը հրաժարվում է օգնել մարկիզուհուն, քանի որ տարված է նախագահ Տուրվելի կնոջով: Սա առաքինի կին է, և Վալմոնին գրավում է նրան գայթակղելու բարդ գործը: Նա որոշակի հաջողության է հասնում: Պերճախոս նամակները ունենում են իրենց ազդեցությունը: Տիկին դը Մերտոյը շարունակում է համոզել Վիկոնտին թողնել այդ ցնորամիտ զբաղմունքը և գալ Փարիզ: Վիկոնտը շարունակում է իր որսը և չի էլ կասկածում, որ ճակատագրի հեգնանքով հենց տիկին դը Տուրվելն է այն կինը, որին նա ողջ կյանքում փնտրում է:

Զուգահեռաբար պատմվում է Սեսիլ Վոլանժի և նրա երաժշտության ուսուցչի՝ շեվալյո Դանսենիի միջև ծագած պատանեկան սիրո մասին: Սեսիլը պատմում է իր սիրո մասին դը Մերտոյին, որին պաշտում է: Մերտոյը, որը ուզում է քանդել Սեսիլի և կոմս Ժերկուրի՝ իր նախկին սիրեկանի գալիք ամուսնությունը, որոշում է անել դա Դանսենիի ձեռքերով: Հանդիպումներ է կազմակերպում, անում է այնպես, որ մենակ մնան: Բայց Դանսենին չի շտապում և չի անցնում «որոշիչ գործողությունների»: Մարկիզուհին դիմում է Վալմոնին, որպեսզի սա սիրո դաս տա անփորձ պատանուն: Վալմոնը, որը հաջողություններ ունի տիկին դը Տուրվելի սիրտը գրավելու հարցում, հետաքրքրություն է ցուցաբերում երիտասարդ Սեսիլի նկատմամբ: Մարկիզուհի դը Մերտոյը Դանսենիին գրգռելու համար պատմել էր Սեսիլի և նրա նամակագրության մասին աղջկա մորը: Սեսիլին մայրը հեռացնում է Փարիզից: Խեղճ սիրահարները կարծում են, թե իրենց մատնել է աղախինը, իսկ Մերտոյը խնդրում է Վիկոնտ Վալմոնին դառնալ բաժանված սիրահարների միջնորդը: Վալմոնին հաջողվում է արագ շահել Սեսիլի վստահությունը: Դանսենիին նամակ գրելու պատրվակով գիշերը թափանցում է Սեսիլի սենյակը… և չի ստանում մերժում: Առաջին սիրո դասերը երիտասարդ սիրահարները ստանում են գլխավոր հերոսների անկողիններում, քանզի մարկիզուհին էլ շուտով առիթ է ունենում գովելու Դանսենիին որպես կրակոտ սիրահարի:

Նամակներից մեկում Վալմոնը տրտնջում է, որ ժամանակից շուտ ավարտված է համարել տիկին դը Տուրվելի հետ պայքարը: Նախագահի կինը առանց հրաժեշտ տալու հեռացել է: Վալմոնը պիտի վերադարձնի նրան: Հասնում է Փարիզ և այցելում է տիկին դը Տուրվելին: Այս հանդիպման ժամանակ դը Տուրվելը վերջնականապես հանձնվում է: Վալմոնը նամակով հիշեցնում է մարկիզուհուն իրենց գրազը: Եթե նա նվաճում է դը Տուրվելին, մարկիզուհի դը Մերտոյը նվիրում է նրան սիրո գիշեր: Դը Տուրվելի նկատմամբ իսկական զգացմունքը վախեցնում է Վալմոնին, և նա լքում է նրան: Կոտրված տիկին դը Տուրվելը հեռանում է մենաստան, որտեղ 2 շաբաթից մահանում է: Վալմոնն ուզում է այցելել դը Մերտոյին, սակայն սա ողջ ժամանակ Դանսենիի հետ է և չի ընդունում Վալմոնին: Վալմոնը պատերազմ է հայտարարում դը Մերտոյին: Նա նամակ է գրում Դանսենիին, որում հիշեցնում է Սեսիլի մասին: Դանսենին, առանց զգուշացնելու դը Մերտոյին, որ իրենց գիշերային հանդիպումը տեղի չի ունենալու, հանդիպում է Սեսիլի հետ: Դը Մերտոյը ցասման մեջ է ընկնում, երբ հաջորդ օրը նամակ է ստանում Վալմոնից, որի մեջ սա ծաղրաբար հարցնում է չհաջողված գիշերվա մասին: Մերտոյը ցույց է տալիս նամակը Դանսենիին և համոզում է մենամարտի կանչել Վալմոնին: Վալմոնը մենամարտում սպանվում է, սակայն հասցնում է ցույց տալ Դանսենիին մարկիզուհու բոլոր նամակները: Այդ նամակները Դանսենին չի թաքցնում հասարակությունից, այնպես որ դը Մերտոյը ստիպված է լինում փախչել Հոլանդիա:

Սեսիլ դը Վոլանժը, իմանալով դը Տուրվելի և Վալմոնի մահվան մասին, հեռանում է մենաստան: Դանսենին լքում է Փարիզը և հեռանում է Մալթա:    

Տես նաև Էդմոն Ռոստան Սիրանո դը Բերժերակ, Միշել Մոնտեն Փորձեր և Բլեզ Պասկալ Մտքեր